// Symposiums

لە ڕێکەوتى ٨ /٤/ ٢٠٢٤، لیژنەی زانستخوازیی بەردەوامی کۆلێژمان، دوو سمیناری ڕێکخست. سمیناری دووەم لە ژێر ناونیشانی : (ڕۆڵی کەناڵی ئاوی بنگریۆن لە ئابووری ئیسرائیل و جیهاندا). کە لەلایەن د.یعقوب مهدی رووف ئامادەکرابوو ، تێیدا گرنگی کەناڵی بنگریۆن کە هەردوو بەندەری ئیلات لە دەریای سوورو بەندەری ئەشدود لەسەر حەوزی دەریای سپی پێکەوە دەبەستێت لە گەشەپێدانی ئابووریی ئیسرائیل و هەندێک لە دەوڵەتانی ناوچەکەو هیندستان و ئەوروپاو ئەمریکا خستەڕوو. لە هەمانکاتدا؛ باسی لەوە کرد دروستکردنی ئەو کەناڵە دەبێتە هۆی لاوازکردنی کەناڵی سوێسی میسریی و داهاتی ئەو کەناڵە بەشێوەیەکی بەرچاو کەم دەکاتەوە. لە درێژەی سمینارەکەدا، هەڵگیرسانی جەنگی غەززەی بە دروستکردنی کەناڵی بنگریۆنەوە بەستەوەو مکور بوو لەسەر ئەوەی بەشێک لە هۆکارەکانی هەڵگیرسانی جەنگی غەززە پەیوەستە بەو کەناڵەوە، چونکە چۆڵکردنی غەززە لە دانیشتوانەکەی ئاسانکاریی بۆ دروستکردنی کەناڵەکە خۆش دەکات

لە ڕێکەوتى ٢/ ٤/ ٢٠٢٤ لیژنەی زانستخوازیی بەردەوامی کۆلێژمان دوو سیمیناری سازدا، دووەم سیمینار بەناونیشانی (حوکمڕانی دروست و مافی هاوڵاتیبوون) بوو کە لەلایەن بەڕێز پ.ی.د. تارا عومەر ئامادەکرابوو، بنەماو ئامانجەکانی حوکمڕانیی تەندروست و پەیوەندیان بە مافی هاووڵاتیانەوە خستەڕوو، هەروەها جەختی لەسەر گرنگیی حوکمڕانی تەندروستی لە بەرەوپێشچوونی کۆمەڵگەو سیستمی سیاسیی و کەمکردنەوەی گەندەڵیی ئابووریی و سیاسیی کردەوە

لە ڕێکەوتى ٣/ ٣/ ٢٠٢٣ لە زانكۆی سلێمانی پانێڵێكی زانستی سەبارەت بەدوا بڕیارەكانی دادگای باڵای فیدڕاڵی عێراق و کاریگەرییەکانى لەسەر هەرێمى کوردستان ئەنجامدرا.
لەپانێڵەکەدا باس لە ماهییەت و چییەتی بڕیارەکان و ڕەهەندە دەستووری و سیاسییەكان و لێكدانەوەی لە ڕووی زانستییەوە کرا کەتێیدا كۆمەڵێك مامۆستای كۆلێژی زانستە ڕامیارییەکان ڕەهەندە جیاوازەکانى بڕیارەکانى دادگاى فیدراڵیان بەشێوەیەكی زانستی خستەڕوو، بەتایبەتى ئەو دوو بڕیارەى تایبەت بوون بە هەڵوەشانەوەی بڕگە و ماددەی یاساکانی هەڵبژاردنی هەرێمی كوردستان، هەروەها بڕیارى گواستنەوەی مووچەی فەرمانبەرانی هەرێمی كوردستان بۆ سەر حكومەتی فیدڕاڵی تاوتوێکران.
لەو بارەوە پڕۆفیسۆری یاریدەدەر دكتۆر عابد خالد ڕاگری كۆلێژی زانستە ڕامیارییەكان وتى: ئەم بابەتە كاریگەری گەورەی هەیە بەتایبەت لەسەر ئایندەی هەرێمی كوردستان لە ڕووى پێگەی سیاسی و ماددەی دەستووری و دارایی هەرێمی كوردستان، لەهەمان كاتیشدا وا چاوەڕوانکراوە بڕیارەکە باكگراوندی سیاسی و ڕەنگدانەوەی ململانێ سیاسییەكان بێت. وتیشى: ڕەنگە كاریگەری هێزی دەركی لەسەر دەركردنی ئەم بڕیارانەی دادگای فیدڕاڵی هەبێت، بۆیە کاریگەرى گەورەیان لەسەر داهاتووى هەرێمى کوردستان دەبێت.

ڕێکەوتى ٢٨/ ١١/ ٢٠٢٣ بەئامادەبوونی ژمارەیەک لە کەسایەتی سیاسی و ئەکادیمی و مامۆستایان و خوێندکارانی زانکۆ لەلایەن کۆلێژی زانستە ڕامییاریەکان، لە هۆڵی کۆنگرێس پانێڵێک دەربارەی ( هەڵبژاردنی ئەنجومەنی پارێزگاکانی عێراق و ناوچە جێناکۆکەکان) بەڕێوەچوو.
بەشداربووانی پانێڵەکە پێکهاتبوون لە فەهمی بورهان سەرۆکی دەستەی ناوچە کوردستانییەکانی ئیدارەی هەرێم و پ.ی. د.جەلال حەسەن یاریدەدەری راگری کۆلێژی زانستە ڕامیارییەکان و هەریەک لە پ.ی.د.زمکان عەلی سەلیم و پ.ی.د. ئەیوب محەمەد تەیب مامۆستا لە کۆلێژی زانستە ڕامیارییەکان.
پانێڵەکە گفتوگۆو وتووێژ بوو دەربارەی کەرکوک و ناوچە کوردستانییەکان لەزەمەنی هەژموونێکی نوێ ی تەعریبدا و هەروەها چارەنوس و رۆڵ و کاریگەری ناوچە جێناکۆکەکان لە دوای هەڵبژاردنەکانی ئەنجومەنی پارێزگاکانی عێراق.